Thursday, June 11, 2020

Japan Bak Migak - 2020

Taber ji ngak kepaut debei menulih dagen blog ieh. Japan bak radi udei ji gaya. Liluk alu agei ko paduhal ako bei blog dagen ubak Liko. Menulih udei dao migik ako pun senged gak ubak asel ko debei. Mun ko pulik kapong, bei singen sau perkataan bao taah ko sebut mak ko. Maler singen ko muaw petaah sebab ko rasa idak angai perkataan wak debei pernah tenaah ko. 

Mun bak nikut atang, ubak Liko nebak ko saji ubak Liko paser. Debei tetu bah asli atang agei buyak ngak pecapor alu jegum ubak Melayu, liko putik serta ubak Melayu Sarawak. Sudah lah ajau ngak kerja maler mapun kubo lalo, alu "nemu jako Iban mimit meh aku tuk".. ha ha ha.. Kak bak debei senubak min sau ubak liko kik owh. Tapi ienlah, lian gak luk liluk ubak telo debei sabila telo jarang angai pubak ubak telo debei. 

Mula ko menulih blog ieh sabei, niat ienlah bak melancar aluk sau ubak Liko ko sebab ko jarang angai petemu a liko lian ako agei belelang gak tanak liko Sabah sabei. Ilak ji kedana ngak wak tulih ko ien siew, 2013 oi. Paut atang ngak, ien lian ko kerja gak Sabah sabei lah ien. Ajau ngak pulik Sarawak ngak. Taun ieh masok 6 taun ngak ko pulik tapi sama kawak, gak kedau keja ajau bukan bei a Liko angai. Bei japah duah singen bak jegum ko kerapak, ienpun ubak liko Mukah sau gaya lien kerapak. 

Ngak tengah malam ngak lian ien. Pekedang tan bulo tekang ajau ien senien, adep bak tan. Ko tudui siew lah. Sebiang siew sebelum tudui, naah bei wak susud sui. Harap ko bak rajin cerita jegum kelo dagen ubak telo debei ieh. Mesti kelo pawah bak taah cerita ko kan? Hahaha.. Yakin angai sau owh. 

Selamat malem gak kelo semuah. 

Monday, January 28, 2013

Tudui ~ Mekat Agei Dao!

Bak nyabik ma'ap sau siew angai ih buyak pa'ut angai ngak dibei alu menulih dagen blog ih. Saji samalah wak debei deniem tenawan alu singen agei owh. Kudong ngak paut angai ji blog ih tudui, dao nigak udei menak oh. Kak badak lenyed alu. Na'ah mun ninyi (search) gak Google prast singen a masok dagen blog ih tapi dibei update alu ji den kelo.

Uno kah bak cerita dao bak memula post wak ih ka?

Ta'un bao ji ngak ajau, 2013. Uno wak dao bak nak ta'un ih kah? Kalik dao mun ko menak kamus ubak Melanau (Kg. Kebuaw @ Dalat). Kamus lah ien tapi debei official angai la. Bukan betul angai kawak ubak liko ko ih. Lo janik-janik ko jegum jipo-jipo ko wak tukang aluk sau keman ko. Ubak ko ih wak idak angai pecapor jegum ubak Melayu jegum uba liko putik. Ka bak budei angai sau ko tukang ubak liko eh. Dei dao kemudei, na'ah tujuh maklumat salak gak kelo.

Ien singelah siew. Mun ko bei lian ko jungat udei blog ih. Idak kawak cerita bak senerita jegum kelo tapi dei ngak lau ih la. Bak cerita duah telo lau ih... he he he he..

Tuesday, August 9, 2011

Ako mengenah manok

Salam gak kelo semuah. Badak dao biyeh telo.

Ngak paut angai ko bedei cerita gak kelo. Wak atang ako debei ta'o bak cerita tapi kalau cerita tudip ako debei, senang aluk ko bak cerita.
Lau ih ako bak cerita pasal tudip ako jegem manok.
Lian ako umit sabei ako suka angei memanah manok tapi debei cun lalu, japah pu'un manok debei kenah ko. Biasa nyin kalau buyak panah, manok lep'ang kelepa'ie atau pu'un matai. Sasek ji manok.

Manok mula angai kenah ko gak Sungai Kut, lian ako susud apak ayang menak kebun. Lian yin umur ko bei lah lima taun. Manok tekukur yin selalu angai labeik gak kebun apak ayang. Lau ko mengenah manok yin, apang ayang debei jegem ko.
Ih sau ko gak manok yin, "ki ih kaau, kak kaau tawie."
Manok yin debei medut gak ko. Ako merapat nyin tapi nyin debei tawie. Lalu manok tekukur yin tenanga'ab ko bak nyagam.
"Buyak lah belatek ko?," sau apak ayang, pedan manok dagen pa'a ko.
"Debei!" saut ko. "Manok kenah tanga'ab ko bebak nyagam.
Manok yin nigek nua pulik mapun kapong kebuwau.
Sibok a kampong.
Bei sau gak luin, manok yin, manok siak a.
Bei sau gak, manok yin, manok tao.
Bei kawak sau gak yin, "anik umit debei tao memudei."
Tapi ngak ko manok yin taji manok suka gak ko.
Kasian manok yin matai, paten ngak menawi dapur kubo lao apang ayang.

Bei yin sabei ako peniti, Yayasan Sarawak sekol mapun Kelantan.
Lian ngak Kelantan, ako bei udei mengenah manok, manok teresi. Anik manok teresi tapi ngak tao teli.
Masa yin bulan puasa, ako pu'un puasa susud luin puasa.
Lian kamei bak buka puasa bah abei, manok teresi jegem anik nyin megap gak kayo gak dawak kanten kedau kamei keman.
Ih sau ko gak sakai ko liko Kelantan, "Kenah ko menaban manok yin inan!"
"Bedei kaau kena'an!", sau sakai ko.
Ako pun mapun gak pu'un kayo kedau manok yin. Selaselui ako tidad kayo kedau manok medut nyin tili.
Daden nasang ako mesussui ngak manok, "Kak kaau tawie."
Labei ko bau, manok kekel bedei tawie lalu tenangab ko nyin.
Keman lau yin lah, ako susui liko Kelantan bei ILMU.
Wak atang ako dibei ilmu uno uno.

Lakau terakhir ako mengenah manok lian ako sekol gak UiTM, Shah Alam.
Lian yin kamei cuti semesta. Ako jegem sakai ko liko Sabah, Rooney, Sodot, Alex Gaban makau mapun Seroja bak keman. Den ko manok KAK (gagak hitam) keman gak tong sampah.
Ih sau ko ngak sakai ko, "Kenah ko mengenah manok yin."
Ako tenatawa luin singen.
Napun ako manok yin serta dagen nasang ko pesusui gak manok, "Kak kaau tawie."
Manok yin pilak ko tapi debei tawie. Lalu tenaban ako manok yin.
"Ih manok! sau ko gak sakai ko, mijak manok wak ngak kenah ko. Bei yin, manok yin nelepah ko udei.
"Ari, kamu pelik lah" sau sakai ko.

Apabila senegad balek jalan tudip ko, idak angei barang pelik tapi benar belaku ngak tudip ko.

Wak atang ako bei jimat wak denipih ako keman ako sekol gak sungai Kut sabei. Jimat ih denipih ako dagen nasang. Ako pesayak ngak a bubak yin.
"BLESSED ARE THE PURE IN HEART, THEY WILL SEE GOD."

Yin singen sau cerita ko lekau ih. Lekau bau telo cerita mengenah binatang.
Peace be with you. God loves you.








Sunday, July 17, 2011

Salam Abei Ito

Ko pado pulik keman paser nei. Ko muka radio Sarawak FM alu peta'ah rancangan Salam Abei Ito. Saji paut atang ngak tan rasa ko debei peta'ah rancangan ih. Kepa'ut ko gak Sabah ih, ih la japan ko peta'ah udei. Alu pawah tan rasa gak kapong, pawah tan rasa bak pulik liko.

Tapi, bei kawak tan rasa kecewa jumit bila ko peta'ah DJ radio ien pebak ubak liko wak pecapor alu sau. Ako debei pun saji debei rapa betul angai sau ubak liko ko, tapi kala kenah dao lah wak nyadin DJ radio ien, ubak liko luin betul sau jumit. Kak idak angai sau senapor jegum ubak Melayu atau ubak Melayu Sarawak. Anik telo wak bao ih, mun peta'ah ubak kesau ien saji tirut luin kawak, makin agei idak angai ngak anik telo wak debei nejaler lo tina tama ubak Melanau wak betul. Ako peta'ah naken ko wak gak Sibau mun kerapak ubak liko idak angai sau senapor jegum ubak Melayu. Selalu kawak ko guga luin migik luin karapak ubak Melanau wak betul.

Bila ngak belajer gak liko a, ubak liko ih jarang angai agei nebak luin sunih, saji luk neliluk alu. Suwik kawak lo naken ko wak gak kapong mun pubak liko saji agei betul sau jumit. Mun wak ngak diam gak luar keman Dalat/ Igan, saji dei rapa betul alu sau ator ubak luin.

Ko arap gak a mengeluar rancangan Salam Abei Ito, pilik DJ kelo wak saji betul sau ubak liko. Sajo tukang pubak liko, dei kira ubak Mukah, Dalat, Bintulu, asal luin kenah kerapak ubak liko wak "standard". Mun ko peta'ah masa rancangan dagen ubak Balah, saji dao angai sau ubak luin. Debei telo peta'ah luin menyapor ubak Balah jegum ubak Melayu. Ko rasa rancangan ubak liko dagen radio Sarawak hanyalah Salam Abei Ito tiap lau migu jam 2 labik 3 abei. Sejam singen telo kenah peta'ah ubak liko nebak kerapak dagen radio. Harap kenah bak diperbaiki rancangan ih terutama sekali dagen penggunaan ubak liko wak 'standard'.

Ien singen lah ji gaya wak kenah bak cerita ko abei lau migu ih.

Thursday, May 5, 2011

Beban

Beban ih bukan kayo. Mun nigek telo kulit bah luar ien, lukuk singen dagen nyin senang singen lipeng pebak nyagem pun kenah. Ko dibei gaber bak tujun gak gi'ih. Mun liko gak bah gi'ih luin menibah ih BAMBAN. Lebih kurang kawak sau owh.

Mun gak kapong, beban ih idak tubuk gak lisi sungai. Sabei gak tebi sungai dawak kubo kamei idak angai tapi ngak jijak bak kedau petaduk padai ji jumit angai ji agei perak den ko. Uno guna beban ih? Beban ih alah bak tali talei. Mun ko pilak lo mak jegum janik ko pigek beban ih bak menak sapau. Sapau nyipak. Bak mubed nyipak ien lah. Saji ien singen ji den ko guna beban ih mun gak kapong. Keman ko umit sabei ko merati lo mak ko menak sapau mesti pigek beban ih.

Mun nikut sau susui sakai ko wak kerja gak Kraftangan Malaysia, Cawangan Sabah gi'ih, nyin susui kraftangan wak ninak keman beban saji berega angai. Lian ih, luin menak beg duit (dompet) pebak beban, handbag pun pebak beban. Makin agei mun wak pekilat alu ji beban ien saji mahal angai sui nyin. Mun la lo mak ko tao menak, saji benadak ko menaduk beban ih. He he.. Bei kawak liko Balah keman Sg. Ileh sabei migek beban bak nak jalik. Dao kawak tan jalik ninak keman beban ih, singo singen tan. Tapi ko dibei penah peden lo mak ko menak jalik pebak beban ih la.

Ok. Ien singenlah ji gaya cerita beban lau ih.... :-)