Ako mengenah manok

Salam gak kelo semuah. Badak dao biyeh telo.

Ngak paut angai ko bedei cerita gak kelo. Wak atang ako debei ta'o bak cerita tapi kalau cerita tudip ako debei, senang aluk ko bak cerita.

Lau ih ako bak cerita pasal tudip ako jegem manok.

Lian ako umit sabei ako suka angei memanah manok tapi debei cun lalu, japah pu'un manok debei kenah ko. Biasa nyin kalau buyak panah, manok lep'ang kelepa'ie atau pu'un matai. Sasek ji manok.

Manok mula angai kenah ko gak Sungai Kut, lian ako susud apak ayang menak kebun. Lian yin umur ko bei lah lima taun. Manok tekukur yin selalu angai labeik gak kebun apak ayang. Lau ko mengenah manok yin, apang ayang debei jegem ko.

Ih sau ko gak manok yin, "ki ih kaau, kak kaau tawie."

Manok yin debei medut gak ko. Ako merapat nyin tapi nyin debei tawie. Lalu manok tekukur yin tenanga'ab ko bak nyagam.

"Buyak lah belatek ko?," sau apak ayang, pedan manok dagen pa'a ko.

"Debei!" saut ko. "Manok kenah tanga'ab ko bebak nyagam.

Manok yin nigek nua pulik mapun kapong kebuwau.

Sibok a kampong.

Bei sau gak luin, manok yin, manok siak a.

Bei sau gak, manok yin, manok tao.

Bei kawak sau gak yin, "anik umit debei tao memudei."

Tapi ngak ko manok yin taji manok suka gak ko.

Kasian manok yin matai, paten ngak menawi dapur kubo lao apang ayang.

Bei yin sabei ako peniti, Yayasan Sarawak sekol mapun Kelantan.

Lian ngak Kelantan, ako bei udei mengenah manok, manok teresi. Anik manok teresi tapi ngak tao teli.

Masa yin bulan puasa, ako pu'un puasa susud luin puasa.

Lian kamei bak buka puasa bah abei, manok teresi jegem anik nyin megap gak kayo gak dawak kanten kedau kamei keman.

Ih sau ko gak sakai ko liko Kelantan, "Kenah ko menaban manok yin inan!"

"Bedei kaau kena'an!", sau sakai ko.

Ako pun mapun gak pu'un kayo kedau manok yin. Selaselui ako tidad kayo kedau manok medut nyin tili.

Daden nasang ako mesussui ngak manok, "Kak kaau tawie."

Labei ko bau, manok kekel bedei tawie lalu tenangab ko nyin.

Keman lau yin lah, ako susui liko Kelantan bei ILMU.

Wak atang ako dibei ilmu uno uno.

Lakau terakhir ako mengenah manok lian ako sekol gak UiTM, Shah Alam.

Lian yin kamei cuti semesta. Ako jegem sakai ko liko Sabah, Rooney, Sodot, Alex Gaban makau mapun Seroja bak keman. Den ko manok KAK (gagak hitam) keman gak tong sampah.

Ih sau ko ngak sakai ko, "Kenah ko mengenah manok yin."

Ako tenatawa luin singen.

Napun ako manok yin serta dagen nasang ko pesusui gak manok, "Kak kaau tawie."

Manok yin pilak ko tapi debei tawie. Lalu tenaban ako manok yin.

"Ih manok! sau ko gak sakai ko, mijak manok wak ngak kenah ko. Bei yin, manok yin nelepah ko udei.

"Ari, kamu pelik lah" sau sakai ko.

Apabila senegad balek jalan tudip ko, idak angei barang pelik tapi benar belaku ngak tudip ko.

Wak atang ako bei jimat wak denipih ako keman ako sekol gak sungai Kut sabei. Jimat ih denipih ako dagen nasang. Ako pesayak ngak a bubak yin.

"BLESSED ARE THE PURE IN HEART, THEY WILL SEE GOD."

Yin singen sau cerita ko lekau ih. Lekau bau telo cerita mengenah binatang.

Peace be with you. God loves you.

Salam Abei Ito

Ko pado pulik keman paser nei. Ko muka radio Sarawak FM alu peta'ah rancangan Salam Abei Ito. Saji paut atang ngak tan rasa ko debei peta'ah rancangan ih. Kepa'ut ko gak Sabah ih, ih la japan ko peta'ah udei. Alu pawah tan rasa gak kapong, pawah tan rasa bak pulik liko.

Tapi, bei kawak tan rasa kecewa jumit bila ko peta'ah DJ radio ien pebak ubak liko wak pecapor alu sau. Ako debei pun saji debei rapa betul angai sau ubak liko ko, tapi kala kenah dao lah wak nyadin DJ radio ien, ubak liko luin betul sau jumit. Kak idak angai sau senapor jegum ubak Melayu atau ubak Melayu Sarawak. Anik telo wak bao ih, mun peta'ah ubak kesau ien saji tirut luin kawak, makin agei idak angai ngak anik telo wak debei nejaler lo tina tama ubak Melanau wak betul. Ako peta'ah naken ko wak gak Sibau mun kerapak ubak liko idak angai sau senapor jegum ubak Melayu. Selalu kawak ko guga luin migik luin karapak ubak Melanau wak betul.

Bila ngak belajer gak liko a, ubak liko ih jarang angai agei nebak luin sunih, saji luk neliluk alu. Suwik kawak lo naken ko wak gak kapong mun pubak liko saji agei betul sau jumit. Mun wak ngak diam gak luar keman Dalat/ Igan, saji dei rapa betul alu sau ator ubak luin.

Ko arap gak a mengeluar rancangan Salam Abei Ito, pilik DJ kelo wak saji betul sau ubak liko. Sajo tukang pubak liko, dei kira ubak Mukah, Dalat, Bintulu, asal luin kenah kerapak ubak liko wak "standard". Mun ko peta'ah masa rancangan dagen ubak Balah, saji dao angai sau ubak luin. Debei telo peta'ah luin menyapor ubak Balah jegum ubak Melayu. Ko rasa rancangan ubak liko dagen radio Sarawak hanyalah Salam Abei Ito tiap lau migu jam 2 labik 3 abei. Sejam singen telo kenah peta'ah ubak liko nebak kerapak dagen radio. Harap kenah bak diperbaiki rancangan ih terutama sekali dagen penggunaan ubak liko wak 'standard'.

Ien singen lah ji gaya wak kenah bak cerita ko abei lau migu ih.

Beban

Beban ih bukan kayo. Mun nigek telo kulit bah luar ien, lukuk singen dagen nyin senang singen lipeng pebak nyagem pun kenah. Ko dibei gaber bak tujun gak gi'ih. Mun liko gak bah gi'ih luin menibah ih BAMBAN. Lebih kurang kawak sau owh.

Mun gak kapong, beban ih idak tubuk gak lisi sungai. Sabei gak tebi sungai dawak kubo kamei idak angai tapi ngak jijak bak kedau petaduk padai ji jumit angai ji agei perak den ko. Uno guna beban ih? Beban ih alah bak tali talei. Mun ko pilak lo mak jegum janik ko pigek beban ih bak menak sapau. Sapau nyipak. Bak mubed nyipak ien lah. Saji ien singen ji den ko guna beban ih mun gak kapong. Keman ko umit sabei ko merati lo mak ko menak sapau mesti pigek beban ih.

Mun nikut sau susui sakai ko wak kerja gak Kraftangan Malaysia, Cawangan Sabah gi'ih, nyin susui kraftangan wak ninak keman beban saji berega angai. Lian ih, luin menak beg duit (dompet) pebak beban, handbag pun pebak beban. Makin agei mun wak pekilat alu ji beban ien saji mahal angai sui nyin. Mun la lo mak ko tao menak, saji benadak ko menaduk beban ih. He he.. Bei kawak liko Balah keman Sg. Ileh sabei migek beban bak nak jalik. Dao kawak tan jalik ninak keman beban ih, singo singen tan. Tapi ko dibei penah peden lo mak ko menak jalik pebak beban ih la.

Ok. Ien singenlah ji gaya cerita beban lau ih.... :-)

Wap Express Sibau

Liluk ko bak cita pasel ko ma'ap pinyi wap seperih ko pulik ujong ta'un lau ien. Ko kajuk mapun Sibau pado jegum janik ko sawak aruh bau. Janik ko wak pado keta nyin, ko magui singen kajuk. Lian ko bak pulik kabak, ko mu'au pilak kedau wap seperih wak dana ien buyak blok ji. Makau kajuk mapun wap bao lah, ja'an bei petemu jegum a liko abak gak kedai kupi dei ja'uk keman ien. Nyin la susui gak ko speed boat ajuk ngak gak wap bao. Makau-makau ko kajuk, mu'au udei peden kelalu idak ji tenawan. Dei ko tao gan kedau bak melei tiket. Sudahlah debei nelayan a agei ko. Makau singen ba'ai pilak gan bei speed bot wak pado mapun Sg. Kut.

Ja'an kawak speed bot jam 1.30 abei dei ngak pado. Sepet kawak ko madak luin lulo ko buyak ko bei bak belei jumit sebelum ko pulik kabak. Ja'an kawak kenah rudeng lo jeragan dagen speed bot ien.

Ih la ji gaber wak sepet nigek ko gak wap bao ien lian ko pulik lau ien.

Seka'ot wak ja'uk ji inan ien wak pado jam 1.30. Wak bah segak aluk ji ih pado
jam 2.30 abei. 

Ih seperih ko pun dei tao pado ka'an. Kalik wak mapun Kapit ka. Ko pun dei tao. 

Ien singenlah bak cerita ko lakau ih. Tiap lakau ko pulik, mesti bei singen wak berubah. Ienlah mun pa'ut jelakau bak pulik kapong ma'ap singen lah ji gaya. Mu'au.. he he he...

Pepela Salui

Ujong ta'un lau ien ko pulik kapong beilah ko pigik gaber lo naken ko jegum mana-mana ji wak dao ji den ko lah.. Biasa mun pepela mesti pebak salui pela. Mun pebak salui ijin, biasa pepela buyak tatah ati kedau dei kenah nado ijin. Ji dagen sungai atau anum badal angai.

Bila cerita pasel pepela ih, senged ko lian ko agei umit sabei. Saji selalu angai pepela salui. Ko mapun sekul lian agei sekolah rendah saji pepela salui. Lian ko darjah 1 labik 3, janik ko agei sekul sama jegum ko. Tapi lian ko darjah 4 labik 6, janik ko masok sekolah menengah ngak. Ko pepela adeplah mapun sekul tiap lau. Lau basak, pangai, tagul nyat, anum salih..ien semuah saji diharungi mun bak mapun sekul. Lian gak sengaja alu ko menak pedih bila pilak anum dug jed angai tan kajuk. Saji sengadei tan kelelah pepela kabak melawen aruih sungai bak mapun sekul... he he he.. Dao sau ulah ko kan? Menak-menak ko pedih migek ko dibuh tabui sekul. Ha ha ha ha...

Okaylah... ih ji gaber lo naken ko pepela salui ujong ta'un sabei. Sera'at alu menaban pela, samalah wak tukang angai pepela. Tapi bila menyenged tan anik a kik wak ngak diam gak bander, saji dibei peluang agei bak menaban pela mun dei pulik kapong. Ienlah mun ko pulik kapong ko suka mengan lo naken ko pulik. Migik luin tao an tan tudip a liko Melanau wak diam gak kapong. Kak subong dei tu pasel bila ngak pakat ayang, keja dao. Asal usul dei senenged agei.

Patang alu Adek menaban pela. Dahla pela ngak perak jebah singen ji agei.
Boboy gak buta ien pun patang alu ji jawai.

Ngak nado salui, ji wak dei ngak pu'eh pepela ji jawai Adek.

Pela ngak nelagak dagen salui. Alu pelik gak anum. Ko suka angai menaban
kayo beh ien nieb dagen anum lian salui nado... Ien lah gaya wak nak Boboy ih.

Ilak ji kanah jawai Adek mun genaber. Keman unei dikandid ko nyin dei sader alu.
Boboy biasalah, kontrol owh Boy!

Ien singenlah bak cerita telo lau ih kai! Cerita udei lau suneh.. Lukuh tan na'e ko. Bak pinyi bak kanen siew.

Seka'ot Super Jet Jegum Seperih Zin Zin

Pa'ut atang ngak ji gaya dibei menulih dagen blog ih. Lo janik-janik ko pun dei luk alu ji menulih dagen ih. Dei hal lah. Bei jelaweh a mengomen dagen blog ko madak ko update selalu blog ih. Sakai blogger kawak ih, Mad Maureen. Nyin saji susud (follow) blog ih paduhal tapi ko dei rapa peduli gak blog ko atak ih. Hmmm... Trima kasih la gak ka'au Mad Maureen, ko nyubak update blog ih selalu. Tapi ubak liko ko ih ngak kelalu angai sau pecapor jegum ubak kik. Mun bei wak salak sau, nyabik ma'ap awal lah ih.

Wak bak cerita ko lakau ih ienlah pasel pengangkutan wak kenah bak bak mapun kapong ko. Kapong ko ngadan nyin Kapong Kebuaw. Mun bak mapun kapong ko dibei alun, pebak sungai singen. Dei tao paya kerajaan bak menak alun mapun kapong kamei ih. Lulo pilihan raya, ngak dakai lakau ngak lo mak ko mengundi tapi dei teruih kawak ji alun. Dibuh "kiruh" sui liko Balah... Asal bei seka'ot jegum seperih, labik la kubo ko gak kapong.

Mun keman Sibau bak mapun kapong ko (kubo ko), bei seka'ot jegum seperih singen. Seka'ot wak teruih labik gak kapong ko ien seka'ot wak mapun Igan. Mun seka'ot mapun Daled dei teruih mapun kapong ko sebab kapong ko antara Sg. Kut jegum Igan. Mun pebak seka'ot mapun Daled kenah kawak tapi pasad gak Sg. Kut Muara, beh ien magui salui a kapong ko wak bei gak Sg. Kut. Biasa nyin kamei pesusui awal gak lo gak kubo nyabik aid gak Sg. Kut Muara mun kamei pulik pebak seka'ot mapun Daled. Mun pebak seka'ot teruih mapun Igan, bei lah 1 jam 45 minit labik gak jawai kubo ko alu. Seka'ot keman Sibau bei pado pukul 10.30 awal jegum 1.30 abei. Mun dei salak ko lah. Mun salak nyabik bak dibetulkanlah. Mun pebak seka'ot mapun Daled, labik gak Sg. Kut Muara kira-kara 1 jam 30 minit. Bei 15 - 30 minit agei pado salui kabak mapun kapong ko.

Ih gaber igik ko lian ko pulik kapong ujong ta'un sabei.
Gaber seka'ot Super Jet gak aba Sg. Kut (Muara). 

Bei jatak agei wak kenah bak mapun kapong ko. Ienlah seperih (Ekspress). Bei idak atak kawak seperih wak agei pado kabak mapun Igan. Mun dei salak ko ngandan lo seperih ienlah Zin Zin, Ing Choon, Hoover.. Ko pun dei rapa senged tan agei jegum ko dei tao awak an wak agei pado. Seperih Zin Zin saji agei pado buyak seperih ien bei kontrak jegum SMK Batang Igan mengan lo anik sekul pulik kapong jegum balik mapun sekul. Seperih ien singen agei wak pebak aircond ko rasa, wak kik ien pebak pangai singen agei.. he he he... Mun keman Sibau bei pado jam 10.30 awal, 12.30 tgh lau jegum jam 2.30 abei. Biasa nyin 3 jam baruk labik gak kapong ko. Saji pedih kabut munguk dagen seperih kepaut ien kan? Tapi mun ngak penuk seka'ot terpaksa kawak jakak dagen seperih ih.

Gaber seperih Zin Zin melipeh gak jawai kubo ko.
Sepet kawak ko pigik gaber ih ujong ta'aun lau ien.

Ienlah ji dua jenis pengangkutan wak kenah bak bak mapun kapong ko. Tabang seka'ot teruih kapong ko mun dei salak ko RM25.00, seperih ien RM15.00. Mun pebak seka'ot labik Sg. Kut Muara singen RM20.00. Kala salak sau ien, nyabik maap kai ieh.. Kenah nulong ko memetulkan info ih. Pulik kapong duah lakau seta'un singen ko ih, ienlah idak angai ngak wak ko dei update gak kapong inan.

Ien singenlah ji gaya bak cerita telo lau ih. Lau sunih mun rajin telo cerita udei. Ien singen!