Tuesday, March 24, 2009

Bebayuh

Lian ko agei umit sabei, mun ko bei pedih wak mengenih angai ji mak ko mesti mengan ko petemu a bayuh.

Ko agei senged masa ko Darjah 2 atau 3 kejien ko bei pedih. Lian ko pulik sekul ko nyarih bak leput. Kelijah alu tan padem jawai ko. Lian nua janik ko pepela pulik kubo ako putak dagen salui. Majih alu tan wak dagen nae ko keluar min. Labik singen nua janik ko gak kubo ako terus masok kubo jegum pelikang. Ulo ako ayong angai tan, asel ako mekat ako mesti putak. Bila mak ko peden ko ketan ien, nyin bukan nya pengan ko mapun klinik, nyin terus menyeged ko buyak singen la buyak wak keman bao sui dengah.

Bah abei ien mak terus mengan ako petemu a bayuh gak Sg. Kut. Liko Sg. Kut mesti tao gak a lakei mero bayuh ih buyak nyin saji glamer angai mubat a. Lian ako dei ngak Baptize nyadin Katolik memang mak ko selalu angai mengan ako petemuk gak a lakei ih. Nyin dibei agei ajau, paut ngak nyin matai.

Ok, terus gak cerita pasel ko pedih unei. Bah abei ien mak terus mengan ako mapun a lakei bayuh ien. Ako dei rapa senged agei tan an tan nyin mubat ko tapi wak senged ko nyin mesti bak menyiluk ji uno wak menak ko pedih. Cara nyin ko dei senged agei kawak tapi beh nyin ngak peden uno ji wak menak ko pedih, nyin akan tujuh rawatan nyin lah, telo lau berturut-turut. Ako agei senged nyin menemuk ko jegum anum benyuh jegum remenit wak ngak dijampi-jampi nyin, jegum daun tebawan. Beh ien bei dedian kenaat nyin, apui dedian ien ninak nyin dagen bebak nyin, ninak nyin bao ulo ko. Beh ien, ulo benalut jegum tuala. Dei kenah pit labik gak kubo. Aiya..idak angai ngak wak dei senged ko. Tapi wak ko tao nyin pesusui gak mak, ako pedih buyak bedua ko nigek tao bao. Kira nelim lien lah. Nyin mubat ko migek bedua ko nelepih lo tao ien.

Ngak kajih pubat ien, macem-macem alu lah ji agei palei wak dei kenah kanen ko. Dei kenah keman bawang putik lah wak ko paling senged. Ko rasalah buyak amo medut gak bawang putik. Nyin mubat a pedih kan pebak roh-roh kegelapan. Kuasa-kuasa wak melawan kuasa Tuhan sebenar nya.

Lian ko agei umit sabei saji ko selalu angai nengan mak ko pubat gak a bayuh buyak nyin percaya angai gak kuasa-kuasa gelap ih. Tapi, masa ko jegum Youth Congress 1997 gak Sacred Heart Sibu, ako buyak Healing for sai-sai wak penah mapun bayuh keman umit. Masa Healing ien lah ko rasa pedih angai tan bila bak mepit semuah ien. Wak menak ko saji medut tan pilak bei jelaweh anik wak tutui kamei ien samalah wak kerasukan singen. Bukan nau, masa jegum Youth Congress ien pun nyin bei "tangkal" juh tina tama nyin. Saji teruk kawak tan nyin buyak Healing masa ien. Beh ienlah, tiap kali ko bei pedih mun mak ko bak mubat ko pebak lo nyuk-nyuk ko mesti melabau keman an nyin kenaan lo nyuk ien. Ko dei luk bak terlibat jegum black magic agei. I put everything in God's hands.

Tapi daolah bak senerita ji gaya adat a liko dana kawak bak tenao telo semuah. Adat bebayuh ih saji agei namel segelintir wak debei percaya gak Tuhan (pagan) ataupun bei segelintir kawak wak percaya gak Tuhan tapi setengah-setengah singen, debei sepenuh hati.

Ien singenlah ji wak kenah bak cerita ko gak gi'ih pasel bebayuh. Tiap a bayuh bei cara lien debei mubat a. Bei wak sampai payun. Ien ko bei peden masa tipo lai bah apak ko. Tapi lian ien ko agei umit angai jadi ko saji liluk gak ji semuah upacara ien. Kalik a kik kenah bak cerita pasel wak ienlah. Ien singen siew keman ko.

3 comments:

  1. hi, im from sibu. bei kah kaau taah pasal aliko mukah practice black magic memikat/control tenawan & that person who practice black magic cannot eat babui.

    ReplyDelete
  2. Hai. Ako dei rapa tao mun cerita pasel a memugai ih. Sui telo a liko pugai ngadan wak memikat2 ih. Mun ngak buyak pugai saji dao singen ji den gak a wak memugai ien. Luk susud a ine singen jegum gila bayang. Tapi ko dei tao pasal a wak cerita kaau ih. Bukan hanya dagen telo a liko bei praktis ih, idak kawak liko kik termasuk liko Balah pun bei kawak praktis ih. The only thing is trust in God. Ask for prayer over from Father if you are Catholic. If not i am not sure how la... God bless!

    ReplyDelete
  3. tremak kasih. ako taah keman tuak kou tapi tuak kou debei luk susui a ngai pasal family yin krna akou ngak sawah gigem anik lin.

    ReplyDelete